31/1/2009 - Sarê Ma: ortak metin ( M.Çetin, E.Yağan, A.Aslan)

Sarê Ma;

Serê her serra newiyê de herkes dileganê xo ano zon.
Roca na serê 2009ie de yemayi kê jü rica u mıneta ma esta, zerrê weşiya hometa ma ra.

Kamo kê ni zoni qesey keno; wazeno cı rê kırmançki vaco, wazeno zazaki, dımılki, kırdki ya ki so-be vaco, hama kamo kê şiya ni zoni de weşiya xo rameno, kamo kê bara ni zoni ‘zonê ma u piyê ma, zonê pir u pirababê ma’ vano, zerrê xo ra kamci namê yeno va yi vaco. Ma pero zanimê kê çımo jü kê berba, çımo bin nêhuno! A ra rica u mıneta ma nawa kê zonê xo rê wayır vecimê. Ma nıwazenimê kê teng u teynayina zonê ma ser zobina thaba vacimê. Per u piya nae zanime. Hal u melalê zonê ma nawo wertê do. Nu hal na dem rut u repaliyo, bêwayıriyo, dina ra surgınıyo, teynayin u teberiyo…

Sarê ma; serê na serra newiyê de kê zonê ma teber do anca!

Ae mektebon ya ki televizonu kenê ya hama zonê ma ninan rayi kê teber do. Ma zanimê kê nayi zura khana hama bara zonê ma anca lal u kherriya. Qeseykerdoğê ni zoni ra ber wayirê zonê ma çino. Mektebê xo çino. Akademiê xo çino. Arsivê xo khemo. Nesirê xo senıko. Berbisê ma, jibiyaisê zav u zecê ma zedê ra ebê zonê ma niyo. Waxto kê nia bo; nu zon feki ma ra bıbıriyo, hewn u ğeyalê ma de mefeteliyo, bıvengiya na dina de mabenê herd u asmeni de zê jü sadowa zelalê bımano. A deqa de deceno roe pir u pirbabê ma; sıma zonê sari de biyê bılbıl hama e kê zonê xo xovira kenê, zonê sari fektê beno zengel, mezela zonê ma kıneno: ayıbo, vano; famkoriyo, bêbextiyo…

Sarê ma; rica u mıneta ma nawa kê ma per u piya ‘endi bes bo’ vacimê!

Çe u çeber de, ra u welağê de, dew u sukê de, kar u gurê de, ka u berbisi de, dugel be dugel surgın de, zerrê u teber de camatê zonê xo biyarimê têare, ebê zonê xo qesey bıkemi, bınusnimê, bıwanimê, bıvacimê. Nu dêno khan reyna barê vılê ma bo’ koti de beno bıbo, key beno bıbo, ma kê amayimê têlewê, zonê xo qesey bıkerimê, bara na mesela qesa xo jü kerimê, dec u dilega xo biyarimê vatenê…

Zonê ma textê mawo, nıka bextê ma do!

Dest bıdimê, veng bıdimê, pheşt bıdimê camat u hunerkaranê zonê ma rê. Têhet de biyarimê têlewê dileg u emegê zonê ma ser gureyinê. Camat u federasyonanê xo rê wayır vecimê. Bara zonê ma tenına raver şimemê. Vaz u awazê zonê xo zerrê ra bıhesnimê..

Sarê ma; zonê ma endi zê berbisê zerrê çeyi memano.

Serê na serra newiyê de rica u mıneta ma nawa kê; wertê zonê theyr u thüri de, wertê hewta u dı mıleti de, zonê mayi kê wes bo, ebê haştiya dar u beri, ebê zerrê weşiya der u cirani emrê xo bıramo..

                                                                        Mehmet Çetin, Emirali Yağan, Ahmet Aslan

3e zemperiyê’09i, emsterdam

Ps: Bu metin ilk kez, 3 Ocak 2009 günü Amsterdam’da, Stichting Klam’ın organize ettiği etkinlikte okunmuştur.